ქართული კულტურის საღამო პრაღაში ანსამბლ "შვიდკაცა"-ს მონაწილეობით
25 მარტს, საქართველოს საელჩოს ორგანიზებით და ჩეხეთის ქართული დიასპორის ხელშეწყობით, ანსამბლ „შვიდკაცა“-ს მონაწილეობით, პრაღაში გაიმართა ქართული კულტურის საღამო, რომელიც მიეძღვნა არამატერიალური მსოფლიო კულტურული მემკვიდრეობის ძეგლების ნუსხაში მყოფ ქართულ მრავალხმიანობას და ქვევრის ღვინის დაყენების უძველეს ტრადიციას.
ღონისძიებაზე მოწვეულ სტუმრებს შესაძლებლობა მიეცათ, ქვევრის ღვინოსთან ერთად, დაეგემოვნებინათ ქართული სამზარეულო. ანსამბლმა „შვიდკაცა“-მ სტუმრებისთვის შეასრულა ქართული ფოლკლორის გამორჩეული სიმღერები, მათ შორის, „ჩაკრულო“, „სულიკო“ და „მრავალჟამიერი“.
ქართული კულტურის საღამოს ესწრებოდნენ ჩეხეთში აკრედიტებული დიპლომატიური მისიების ხელმძღვანელები და ჩეხეთის ხელისუფლების წარმომადგენლები.
საელჩო მადლობას უხდის ჩეხეთის ქართული დიასპორის წევრებს, რომელთა მხარდაჭერით შესაძლებელი გახდა აღნიშნული ღონისძიების ორგანიზება.
